कुडाळ -मालवण मतदारसंघासाठी खासदार नारायण राणे यांनी घेतली मुख्यमंत्री एकनाथ शिंदे यांची भेट…
मुंबई प्रतिनिधी
खासदार नारायण राणे हे आता विधानसभा निवडणुकीच्या तयारीला लागले आहेत. लोकसभेला शिवसेना शिंदे गटाच्या ताब्यात असलेला रत्नागिरी सिंधुदुर्ग मतदार संघ राणे आपल्या पदरात पाडून घ्यायला यशस्वी ठरले होते. शिवाय त्यांनी विजयही मिळवला होता. आता शिवसेना शिंदे गटाच्या ताब्यात असलेला आणखी एक मतदार संघावर राणे यांचा डोळा आहे. हा मतदार संघ आपल्याला मिळावा यासाठी राणे यांनी आतापासूनच फिल्डींग लावली आहे. त्यासाठी त्यांनी मुख्यमंत्री एकनाथ शिंदे यांची वर्षा निवासस्थानी भेट घेतली. या दोन्ही नेत्यांची या मतदार संघाबाबत बंद दाराआड चर्चा झाली.
नारायण राणे हे सिंधुदुर्ग जिल्ह्यातील कुडाळ- मालवण या विधानसभा मतदार संघासाठी आग्रही आहेत. या मतदार संघात शिवसेनेचे वैभव नाईक हे विद्यमान आमदार आहेत. शिवसेनेत फुट पडल्यानंतर वैभव नाईक यांनी ठाकरेंची साथ दिली. त्यामुळे या मतदार संघावर महायुतीत शिवसेना शिंदे गटाचा दावा आहे. मात्र हा मतदार संघ भाजपला सुटावा असे राणे यांचे प्रयत्न आहेत. या मतदार संघातून राणेंचे पुत्र निलेश राणे हे निवडणूक लढण्यास इच्छुक आहेत. त्यांनी या मतदार संघात तयारीही सुरू केली आहे. शिवाय निवडणूक लढणार याचे संकेतही त्यांनी दिले आहेत. कुडाळ मालवण हा मतदार संघ शिवसेनेचा गड समजला जातो. नारायण राणे यांनी याच मतदार संघातून अनेक वेळा विजय मिळवला होता. शिवसेना सोडल्यानंतरही राणे यांनी काँग्रेसच्या तिकीटावर या मतदार संघातून विजय मिळवला. मात्र 2014 च्या निवडणुकीत राणे यांचा पराभव झाला. शिवसेनेच्या वैभव नाईक यांनी त्यांचा मोठ्या फरकाने पराभव केला. त्यानंतर राणे कुटुंबातील कोणीही या मतदार संघातून निडणूक लढवली नाही. वैभव नाईक यांनी 2014 आणि 2019 अशी सलग दोन वेळा इथून विजय मिळवला होता आता या मतदार संघावर डॉ निलेश राणे यांचे प्राबल्य आहे, लोकसभेच्या निवडणुकीत खासदार नारायण राणे ni यांना तब्बल सत्तावीस हजाराचे मताधिक्य मिळाले होते, त्यामुळे हा मतदारसंघ कोणत्याही परिस्थितीत लढायचाच यावर डॉ निलेश राणे ठाम आहेत मग तो शिंदे शिवसेने कडून की भाजप कडून हे येणारा काळ ठरवणार आहे.
