संघर्षातून यशस्वी युवा नेतृत्वापर्यंतचा प्रेरणादायी प्रवास!
सिंधुदुर्ग प्रतिनिधी
नावात विशाल..लोकांच्या मनात असा विशाल परब कुडाळ तालुक्यातील वाडोस या गावातून आपल्या कार्यातून भारतीय जनता पार्टीचे राज्य युवा नेते आणि यशस्वी उद्योजक विशाल प्रभाकर परब यांचा वाढदिवस त्यांच्या सामाजिक, राजकीय आणि सेवाभावी कार्याचा आढावा घेण्याची संधी ठरत आहे.
माणगाव खोऱ्यातील वाडोस या छोट्याशा गावात जन्मलेल्या विशाल परब यांनी संघर्ष, जिद्द, मेहनत आणि आत्मविश्वासाच्या बळावर स्वतःची वेगळी ओळख निर्माण केली. उद्योजक म्हणून यश संपादन करतानाच त्यांनी आपल्या मातीशी असलेली नाळ कायम जपली. सामाजिक बांधिलकी आणि जनसेवेच्या माध्यमातून तळकोकणातील वाडी-वस्तीपर्यंत पोहोचण्याचा त्यांचा प्रयत्न सातत्याने दिसून येतो.
गरजूंना मदतीचा हात, आरोग्यसेवेला प्राधान्य!
गोरगरीब, गरजू आणि संकटग्रस्त नागरिकांना मदतीचा हात देणे हा त्यांच्या सामाजिक कार्याचा महत्त्वाचा भाग आहे. वैद्यकीय उपचारांसाठी आर्थिक मदत, विद्यार्थ्यांच्या शिक्षणाला सहकार्य आणि अडचणीत असलेल्या कुटुंबांना आधार देण्याच्या माध्यमातून त्यांनी जनसंपर्क अधिक दृढ केला आहे.
सावंतवाडी, दोडामार्ग आणि वेंगुर्ला तालुक्यांत आयोजित करण्यात आलेल्या मोफत महाआरोग्य शिबिरांमुळे अनेक नागरिकांना आरोग्य तपासणी आणि उपचारांच्या सुविधा उपलब्ध झाल्या. तसेच ग्रामीण भागातील आरोग्यसेवेत महत्त्वाची भूमिका बजावणाऱ्या आशा स्वयंसेविकांचा सन्मान करून त्यांच्या कार्याप्रती कृतज्ञता व्यक्त करण्याचा उपक्रमही त्यांनी राबविला.
युवकांना प्रोत्साहन, कला-क्रीडा क्षेत्राला बळ!
कोकणातील पारंपरिक संस्कृती, कला आणि क्रीडा क्षेत्राला प्रोत्साहन देण्यासाठी विशाल परब विविध उपक्रमांतून योगदान देत आहेत. क्रीडा स्पर्धा, सांस्कृतिक कार्यक्रम आणि सण-उत्सवांच्या माध्यमातून स्थानिक युवकांना व्यासपीठ उपलब्ध करून देण्याबरोबरच सामाजिक एकोपा वाढविण्याचा प्रयत्न त्यांच्या कार्यातून दिसतो.
राजकीय आणि संघटनात्मक क्षेत्रातही त्यांनी सक्रिय भूमिका बजावली आहे. भारतीय जनता युवा मोर्चाचे महाराष्ट्र प्रदेश उपाध्यक्ष म्हणून काम करताना त्यांनी संघटनात्मक कार्याचा अनुभव घेतला. खासदार नारायण राणे, भाजप प्रदेशाध्यक्ष रवींद्र चव्हाण आणि पालकमंत्री नितेश राणे यांच्या मार्गदर्शनाचा उल्लेख ते आपल्या वाटचालीत महत्त्वाचा मानतात.
कुटुंबाची साथ आणि सामाजिक बांधिलकी! या प्रवासात त्यांच्या पत्नी सौ. वेदिका परब यांची साथ, आई प्रमिला परब आणि वडील प्रभाकर परब यांचे आशीर्वाद, तसेच कुटुंबीयांचे पाठबळ महत्त्वाचे ठरले आहे. कौटुंबिक संस्कार आणि सामाजिक जाणीव यांचा संगम त्यांच्या विविध उपक्रमांतून जाणवतो.
सावंतवाडी, दोडामार्ग आणि वेंगुर्ला परिसरात जनसंपर्क वाढवत सामाजिक, आरोग्यविषयक आणि सांस्कृतिक कार्याच्या माध्यमातून लोकांशी जोडले जाण्याचा त्यांचा प्रयत्न सुरू आहे. राजकारणापलीकडे जाऊन समाजातील गरजू घटकांसाठी काम करण्याची भूमिका त्यांच्या कार्याला वेगळी दिशा देते.
वाढदिवसानिमित्त शुभेच्छांचा वर्षाव!
विशाल परब यांच्या वाढदिवसानिमित्त त्यांच्यावर शुभेच्छांचा वर्षाव होत असून, आगामी काळातही त्यांच्या हातून समाजोपयोगी उपक्रम घडावेत, युवकांना नवी संधी मिळावी आणि तळकोकणातील नागरिकांच्या प्रश्नांना मदतीचा आधार मिळावा, अशी अपेक्षा व्यक्त होत आहे. संघर्षातून उभे राहिलेले नेतृत्व, सामाजिक कार्याची ओढ आणि जनतेशी जोडलेली नाळ यांच्या बळावर विशाल परब यांचा पुढील प्रवास अधिक व्यापक व्हावा, हीच वाढदिवसानिमित्त सदिच्छा!
